AASU-in Nagaland mamawh chawk luhna danah a vau

All Assam Students Union (AASU) chuan Nagaland sorkar vauin, Assam ram china an lut lui zel a nih chuan an state-in mamawh an chawk luhna kawng­pui dan sakah a vau. 

Assam zirlai pawl chuan Nagaland-in an ram inches khat pawh an lak an remti ngai dawn lo tih an sawi. 

Thawhṭanni khan AASU member-te chuan  Jorhat forest division hnuai, Mariani Range-a  Dissoi Valley Reserve Forest-a Nagaland sorkarin police camp a siamna hmun an tlawh. Hemi hnu hian Assam police team chuan Nagaland lo danna atan hian an bul lawkah hian camp an siam zui ve nghal a ni. 

Assam lamin an ram chinah Nagaland a lut nia an puh avangin Assam-Nagaland ramri boruak a ṭha lo chho hle a, Jorhat,Assam leh Mokokchung, Nagaland district official-te pawh an inbe tawh a ni. 

Jorhat official-te chuan Naga­land chu state pahnihte ram an inchuh meka in an sakte chu ṭhiat turin an phut. Supreme Court chuan ramri buaina laiah hian buaina chinfel a nih hma chuan state pahnihte hian in leh thil dang engmah ansa tur a ni lo tiin a lo sawi tawh a ni. 

November 9 khan Assam police-te chuan Mokokchung district thuneituten ramri buaina hmuna an in sak nia an sawi chu an lo ṭhiah sak tawh a, a hnu ni hnihah Nagaland lamin camp an siam chu an ṭhiat leh bawk. 

AASU chuan Assam ram chin humhalh zo loah state sorkar chu puhin, home department changtu ni bawk chief minister Sarbanda Sonowal chu an dem thu an sawi. 

Zirlai pawl chuan Assam Chief Minister chu Nagaland nena ramri chungchanga an buaina neih meka ngawi rengah puhin, Nagaland lamin Assam ram chhung, Nagajanka-a Border Out Post (BOP) pahnih a siam hnuah pawh engtinmah hma la zui loah an puh. Hemi rual an ram neih sak tuma chete an hmachhawnna kawngah Assam Police-te erawh an fak hle tih an sawi thung. 

Nagaland chuan Dissoi Valley Reserve Forest-a ram 82% zet rawn luahah AASU chuan a puh. State sorkar chuan an ram luahtu, Naga mite hi a hnawtkir thei lo a nih chuan nawrh huaihawtin, Nagaland-in mamawh a chawk luhna kawngpui chu dan sakah an vau a ni. 

Arunachal Pradesh-a Upper Siang district truck driver pakhat thah a nih avangin Rukin leh Likabalia area-a Assam-Arunachal Pradesh ramri boruak a ṭha lo hle. 

Lower Siang deputy commi­ssioner AK Singh chuan Assam lam hian kawngpui dangin; Silapthar, Rukin leh Dimo area-ah Arunachal motor-te an dang vek niin a sawi. 

Truck driver hi Assam-a Dhe­maji district mi a ni a, Tuting bul kawngpuia kahhlum nia sawi a ni. Tualchhung mite chuan driver leh a kaphlumtu nia puh hi an inhnial buai a, a hnialpui pa hian SBBL gun hmangin a kaphlum niin an sawi a ni. He thil thleng duh loh hian Assam lam chuan ramri bulah lung­awi lohna pawh an lo lantir tawh a, kawng an dansak zui ta a ni.