Manipur bomb puak duh-lohna sit-in protest nei

Manipur-a Sadar Hills Autonomous District Council Kangpokpi Councillor leh staff-te chuan Inrinni khan ADC Sadar Hills chenna in bula Zirtawpni-a bomb puak duh lohna lantir nan sit-in-protest an nei.

Sit-in-protest hi vice-chairman, ADC Sadar Hills, Thangjakam Misao chuan kaihruaiin chawhma dar 11:30 aṭanga tlai dar 2 thleng an nei a ni.

He hunah hian ADC Sadar Hills councillor leh staff zawng zawng an tel a, chief executive officer, T. Manihar Singh, additional CEO, Lhingkhonei Lotzem bakah ADC Sadar Hills Education department-te pawh an tel.

Sit-in-protest an neih­naah hian thuziak te keng­in ADC Sadar Hills Chair­man chenna in bula bomb puak an duh loh thu te an tarlang a, bomb phum chu mawlzia lantirna a ni tih thuziak te an ken bakah bomb tipuak tu hrem an duh thu te pawh an tarlang bawk.

Media miten an kawmnaah Thangjakam chuan ADC Sadr Hills Councillor zawng zawng leh staff zawng zawng te chuan bomb puak chu an dem thu a sawi a, an chairman chenna in bula bomb puak chuan a ṭhawn thu sawiin Sadar Hills-a ralmuan lohna thlen chu Sadar mipuite do zawnga chetna a ni, a ti.

Thangjakam chuan tharum thawhna leh pawikhawih zawnga chetna chu Kangpokpi district ralmuanna tihchhiat tumna a ni, a ti bawk.

Buaina reng reng chu inbiakna hmanga chinfel theih a nih thu sawiin bomb phum emaw tharum thawhna hmang emaw a chinfel chi a nih loh thu a sawi bawk a ni.