HNCL general secretary thar atan Saiñkupar Nongtraw ruat

Meghalaya hel pawl Hynniewtrep National Liberation Council(HNCL) chuan an pawl general secretary thar atan Saiñkupar Nongtraw an ruat.

Saiñkupar Nongtraw hi publicity secretary ni lai mek a ni a, he dinhmun hi a la chelh tel tho dawn a ni.

HNCL hi an general secretary hlun tak mai Cherishterfield Thangkhiew chuan kar hmasa Ningani khan sorkar kutah a inpek san a, hemi avang hian general secretary thar hi an ruat a ngai ta a ni.

General secretary thar Nongtraw chuan an pawl chuan general secretary thar atan an ruat thu a sawi a, an general secretary chhuak ta in an pawl leh sorkar inkara inbiakna kalpui a tumna pawh chu an pawm tih a sawi bawk. An pawl chuan Thangkhiew chungchang chu sawizui tur an nei lo tih sawiin hel pawl chawlhsan turin thutlukna a siam ta niin a sawi.

Thangkhiew chu mi ṭha tak leh huaisen tak a nih thu sawiin an pawl tana a inpekna chu a thlawn dawn lo a ni, a ti a, an pawl dinchhuaktu zinga mi a nihna chu an hrereng dawn niin a sawi bawk.

Cherishterfield Thangkhiew hi kar liamta Ningani khan Deputy Chief Minister Prestone Tynsong hmaah State Police Headquarters-ah a inpe a ni. Tunah hian HNCL hi military wing commander Bobby Reagan Marweiñ kaihhruaina hnuaiah an awm mek a, Marweiñ hi tunah hian Banglandesh-ah a biru mek a, Thangkhiew pawh hi a inpek hma kum eng emaw zat kha chu Bangladesh-ah hian a biru ve bawk a ni.