CAA chungchanga Amit Shah thusawi-ah AASU an lawm lo

All Assam Student Union (AASU) chuan union home minister Amit Shah-a'n Citizenship Amendment Act (CAA) chu ram chhunga Covid-19 hri leng a ziaawm hunah hman a ni ang tia a sawi chu an lawm lo hle a, minister thusawi hi an pawm lo tih an sawi.

Amit Shah thusawi chungchangah hian AASU chuan thuchhuah siamin, a thusawi chu an ṭawmpui thei lo tih an sawi. AASU president Dipankar Kumar Nath chuan hetiang chungchang an sawina chhan hi BJP-in vote an zawnna a ni tiin, BJP chuan CAA chu vote zawnna atan a hmang leh a ni, a ti.

Nath chuan BJP hian CAA hman a niha a nghawng dan tur pawh a hrethiam veka, hei vang hian tun thleng pawha rules a la siam fel loh chhan a ni, a ti. Sorkarin CAA rules hi a siam a nih chuan an pawl chuan court lamah an beih let bakah, kawtthlerahte he dan duh lohna hi an lantir chhunzawm leh dawn tih a sawi nghal bawk.

AASU chief advisor Samujjal Bhattacharya chuan hmarchhak state-te chu dan loa Bangladesh mi rawn lutte dahkhawmna tur hmun a ni lo tih a sawi.

Svivasgar MLA, Akhil Gogoi pawhin eng ramah mah dan loa an rama lutte an awm ngheh theihna tur khua leh tui nihna pek theihna dan hi a awm ngai lo tih a sawi ve bawk a ni. Gogoi chuan sorkar laipui chu CAA rules siam lo tura vau zuiin, Covid hri leng a reh hnuah pawh ni se CAA hi eng kawng mahin an pawm dawn lo tih a sawi a ni.