Guwahati-a football ground siam phutna Bhaichung Bhutia-a'n a thlawp

Assam-a footballer-ten an state khawpui, Guwahati-a football ground siam tura sorkar an phutna chu Indian national football team captain hlui, Baichung Bhutia chuan a thlawp thu a sawi.

Football a chawlhsan hnua politics khela Hamro Sikkim Party (HSP) dintu, Bhaichung Bhutia chuan a twitter-ah Assam-a footballer-ten inkhelhna hmun an mamawh thu aupui an ngai chu pawi a tih thu sawiin, Assam sorkar chuan an thil phut hi a ngaihtuahsak ngei a beisei thu a sawi bawk.

February 20 khan Assam-a footballer 500 vel chuan Guwahati-ah nawrh huaihawtin, state sorkar chu football ngaihthah lo tura phutin, Guwahati-ah football ground siam turin an phut a ni.

All Assam Football Players' Assocation president Hem Das chuan state khawpuiah hian football khelhna field pakhat pawh an nei lo niin a sawi. Khawpui chhunga stadium ṭhate chu cricket khelhna tur bik atan dah vek a ni, a ti.