Tripura sorkarin Class 1-12 zirlaite tan In lama an zirna tur workbook a siam

Tripura sorkar chuan Class 1-12 zirlaite tan in lama lehkha an lo zirna tur workbook a siam.

Education minister Ratan Lal Nath chuan zirlaite tan hian State Council of Educational Research (SCERT) chuan subject 85-ah workbook a siam thu sawiin, hei hi India rama kalpui hmasa an nih thu a sawi. Heng workbook-te hi zirlaite hnenah a thlawnin sem a ni ang.

Minister chuan, "Zirlaite hian guidebook leh note-te hi hmun danga mi an lei fo ṭhin. Hei vang hian in lama an lo zir tur workbook hi siam a ni ta a ni," tiin a sawi a, SCERT leh school education department chuan academic session aṭanga hman ṭan turin zirlaite hnenah heng workbook-te hi an sem vek dawn tih a sawi. Workbook-ah hian practice set leh exercise-te dah tel a ni.

Kumin January 29 khan minister Ratan Lal Nath chuan state chhunga zirna in hrang hrangte hawn a ni dawn tih a lo puang tawh a ni. Hri leng vanga hun rei tak zirna in khar chuan naupangte thiamna kawngah leh an rilru hriselna lam thlengin nghawng a nei nasa hle tih a sawi.