Local body-a hmeichhiate quota hman loh vangin Supreme Court-in Nagaland sorkar a khak

Supreme Court chuan Nagaland sorkar chu state urban local body-a hmeichhiate quota, 33% siam chu an la hman loh avangin a khak.

Court chuan municpal leh town council-a hmeichhiate tana 33% reservation siam kalpui a tum dan chu kar ruk chhung ngeia report thehlut turin Nagaland sorkar hi a hrilh nghal a ni. State sorkar chuan hma a la thuai a nih loh chuan court-ah reservation hi kalpui turin thupek a tichhuak mai dawn a ni, a ti. Hemi chungchang hi April 12-ah ngaihtuah a ni leh ang.

Peoples Union for Civil Liberties (PUCL) leh woman activist Rosemary Dvychu chuan kum 2021, September 22-a Nagaland Assembly resolution siamah, state chhunga municipal leh town council-a hmeichhiate tana seat 33% dah tura tihna chu telh a ni lo tih sawiin, Supreme Court-ah hian petition an thehlut a ni.

Petition thehluh hi Thawhlehni khan Supreme Court chuan ngaihtuahin, state sorkar chu kar ruk hun a pe a, hma a la zui lo a nih chuan Court thupek bawhchhiaah ngaih a ni dawn tih a hrilh nghal bawk.