Meghalaya sorkarin Assam nena ramri chinfel dan NGO-te a hrilhfiah

Meghalaya sorkar chuan Nilaini khan NGO hrang hrang aiawhte kawmin, Assam nena state ramri paruka chinfelna tura inremna an siam dante a hrilhfiah.

Chief minister Conrad K Sangma chuan kimchang taka hrilhfiah an nih thu a sawi a, mahse hard copy erawh an la pe thei lo tih a sawi a ni. Pawl hrang hrangte chuan hard copy hi an duh thu sawi mah se, union home ministry nena meeting an neih leh phawt a ngai tih a sawi a ni.

Meeting-ah hian Khasi Students’ Union (KSU), Federation of Khasi Jaintia Garo People (FKJGP), Hynñiewtrep Youth Council (HYC), Hynñiewtrep National Youth Federation (HNYF) te pawh an tel a ni. NGO-te chuan ramri buaina chinfelna tura state sorkar pahnihten inremna an lo siam tawh chu pawm nghal ngawt lo a, sawiho leh phawt an duh thu an sawi bawk.

KSU president Lambok Marngar chuan an pawl chuan an la sawiho leh dawn a, ramri hmun paruk tlawhtu tur team pawh an din dawn tih a sawi. Marngar chuan ramri buaina bial chhunga chengte chu an kawm dawn a, state sorkar pahnihin buaina chinfelna tura inremna an siamte chu an thlawp leh thlawp lohte an zawt phawt dawn tih a sawi. "Hemi avang hian sorkar report hi kan hnawl ta tihna a ni lo a, mahse ziaka inpek engmah a awm rih loh avangin lo pawm leh pawm loh tur engmah a la awm lo," a ti.

HNYF general secretary Sadon Blah chuan inrawnna mumal tak a awm lo tih sawiin, sorkar lam chuan inremna an siam dan chungchang hi a sawifiah ṭha lo tih a sawi. "He report a siam hma hian state sorkar hian tualchhung hotute leh border area-a chengte ngaihdante a ngaithlak sak em tih kan chiang lo a ni. Consultative meeting ni loin, sorkarin sorkar chungchanga a thil tihfel tawh a sawina ang chauh a ni," tiin a sawi bawk.

HYC president Robertjun Kharjahrin pawhin state pahnihte inremna lo siam tawhah hian thutlukna engmah an la siamlo tih sawiin, ṭawngkam chauha hrilh an la nih avangin an tan pawh lo pawmpui nghal mai a harsa tih a sawi.