Tripura sorkarin film institute siam dawn

Tripura sorkar chuan Kolkata-a Satyajit Ray Film and Television Institute nena thawkdunin, film institute a din dawn tih state information and cultural affairs minister Sushanta Chowdhury chuan Nilaini khan a sawi.

Minister chuan film institute siamna tur hma lak ṭanna turin kumin budget-ah pawh cheng vaibelchhe 5.75 dah a ni ang, a ti bawk.

He thu hi Agartala-a 2nd Bangladesh Film Festival hawnnaah a sawi a, an ruahmanna bawhzui tur hian department team-te chuan Kolkalta an tlawh thuai tur thu a sawi a ni. Film institute siam dan turte min ngaihtuahpui tur hian Satyajit Ray Film Institute team pawhin kan state rawn tlawh se kan duh a ni, a ti.

Chowdhury chuan film industry chuan ṭhalai tam tak, a bikin talent nei ṭhate tan eizawnna tur remchang a siamsak tih a sawi a, "Actor leh actresss-te chauh ni loin, film industry chuan director, singer, musician, light and sound artist, photographer, lyricist leh scrip writer-te a mamawh tel vek a ni. Chief minister Biplab Kumar Deb pawhin he project hi a tuipui hle a, a rang thei anga tihpuitlin kan tum a ni," tiin a sawi.

Minister chuan an state chhunga district leh sub-division hrang hrangah Bangladesh Film Festival chu state sorkarin huaihawt a tum thu sawiin, hemi hmang hian Tripura leh Bangladesh mipuite inkarah inzawmna nghet tak siam an duh tih a sawi bawk.