Arunachal Assembly-in logo thar nei
Arunachal Pradesh Legislative Assembly (APLA), Ningania ṭhukhawm chuan an state-in logo thar an hman tur thu an pass.
He Assembly inkhawmah hian Speaker PD Sona chuan member-te hmaah an state logo thar chu a pho chhuak a ni. Logo tharah hian an state 'national emblem', 'foxtail orchid' (Rhynchostylis retusa) leh 'state flower'-te a chuang a ni. 'National emblem' hian India Constitution hnuaia state hrang hrangte inzawm khawmna a entir a, 'foxtail orchid' hian state mipui, hnam zia leh nunphungte a entir bawk a ni. Democracy hnuaia state assembly din a nih ang ngeiin logo awmze nei tak siam ṭha an tih avangin logo thar hi siam an nih thu an sawi bawk.
ILP khauh zawka kenkawh tum
APLA ṭhukhawm chuan an state chunga inner line permit (ILP) chu khauh zawka kenkawhna tur thu an rel.
"Arunachal-a Changlang, Namsai leh Papumpare district-a Chakma leh Hajong khawsa mekte hian, Citizenship Amendment Act (CAA) 2019 kaltlangin India ram khua leh tui nihna an nei thei a, mahse heng mite hian ILP an neih loh chuan kan state-ah hian an awm ngawt thiang lo a ni. Heng mite hian an duh leh state dang aṭangin India khua leh tui nihna la mai rawh se," tiin Arunachal chief minister Pema Khandu chuan Question hour huna Congress MLA Ninong Ering zawhna changin a sawi.
Khandu hian Bengal Eastern Frontier Regulations (BEFR), 1873 hnuaiah IPL chu khauh taka kenkawh a nih theih nan hian all party meeting koh vat a tum thu house inkhawm a hrilh. Chin Hills Regulation 1896 chungchang pawh Khandu hian sawi langin, he regulation hi kan state-ah hman la ni lo mah se, Indian Constitution-in kan hman tura a duan a nih avangin, kan state-ah hian kan hmang thuai dawn a ni, a ti bawk.