Citizenship Bill duh loh vangin darkar 12 bandh

Assam-a Citizenship (Amendment) Bill, 2016 kalpui tum duh lohna lantir nan nimin khan pawl 46 intelkhawm chuan darkar 12 awh bandh an huaihawt.

Nimin zing lama police report in a tarlan dan chuan Citizenship Bill duh lotute hian rel kawng te pawh dan an tum a, rel tlan dalna tur te an dah a ni. Police-te chuan mi ṭhenkhat phei chu rel tihdin tumin relkawngah an ṭhu niin an sawi a, mahse heng mite hi an nawrsawn niin an sawi.

State chhung hmun hrang hrangah motor tyre-te pawh an hal bawk a, public transport lirthei te chuan buaina an tawh lohna turin police ten an veng bawk a ni.

Bandh hi Krishak Mukti Sangram Samiti (KMSS), Asom Jatiyatabadi Yuba Chatra Parishad (AJYCP) leh pawl dang 44-te huaihawt a ni a, heng pawl hrang hrang te hian Parliament thlasik session-a Citizenship (Amendment) Bill, 2016 pawm tumna awm chu an duh lo a ni.

Bandh hi eptu party hrang hrang Congress leh AIUDF-te chuan an thlawp thu an sawi a, mipuite leh ram leilung fate duhdan a nih avangin an thlawp niin an sawi.

Bandh avang hian sorkar chuan district magistrate zawng zawng leh superintendents of police zawmg zawng te chu uluk taka duty turin a hriattir a, deputy commissioner te pawhin thuchhuah siamin sorkar official zawng zawng te chu uluk taka duty turin an hriattir niin an sawi.

DC-te chuan an district huamchhung ṭheuha dawr, sumdawnna hmun leh zirna in te chu hawng tura an hriattir thu an sawi bawk a ni.

Citizenship (Amendment) Bill, 2016 hi Lok Sabha-ah pharh a ni a, Citizenship Act, 1955 siamṭhatna a ni a, he Bill hnuaiah hian Hindu, Sikh, Buddhist, Jain, Parsis leh Kristian sakhaw vuantu Bangladesh, Pakistan leh Afghanistan aṭanga December 31, 2014 hmaa lo lut te chu India khua leh tuiah an pawm theih dawn a ni.

State Finance and Health Minister Himanta Biswa Sarma chuan Thawhṭanni khan Gauhati High Court in bandh huaihawt chu dan kalh a nih thu a tarlang tih sawiin pawm a nih theih loh thu sawi mah se Krishak Mukti Sangram Samiti leader Akhil Gogoi chuan bandh chu an huaihawt vawikhatna a nih thu leh, Citizenship Bill Assam mite leh an nihna nghawng thei thil anih avangin an pawm thei lo a, chuvangin bandh chu an kaltlangpui dawn thu a sawi ve thung.