Khasi Lineage Bill 2018 leh ILP Resolution pharh turin KHADC inpeih

Meghalaya-a Khasi Hills Autonomous District Council (KHADC) exe­cutive committe chuan sawi hlawh tak Khasi Social Custom of Lineage Bill, 2018 leh Inner Line Permit (ILP) system kalpui dan tur resolution an siam chu October 25-26-a Council special session-ah pharh a ni dawn tih a sawi.

KHADC CEM His­prea­ching Son Shylla chuan special session-ah chuan Khasi Social Custom of Lineage Bill, 2018 chu an pharh ṭhat leh dawn thu sawiin uluk taka an zirchian hnuah bill-a ṭha lo an tih lai te chu an paih niin a sawi bawk.

Shylla chuan “Tip Kur-Tip Kha” zulzuiin inneih dan chungchang pawh chiang takin an tarlang tih a sawi a ni.

Khasi Lineage Bill hi Khasi hmeichhia ten Khasi ni lo pasal an neih lohna tura duan a ni a, sawisel a hlawh hle nghe nghe a ni. KHADC CEM chuan ILP chungchanga resolution an siam pawh an pharh dawn tih sawichiang nghalin, ILP kalpui a nih theihna tur hian Eastern Bengal Regulation, 1873 hriattir turin Meghalaya Governor chu an ngen dawn tih a sawi.

Ni hnih awh tur special session-ah hian EC chuan Subordinate Council of Traditional Chiefs and Headmen Bill 2018 leh Town Committee Rules for implementing the building bye-laws-te pawh an pharh dawn bawk a ni.