Manipur : Inthlanna felfai nei turin ngawrh takin inbuatsaih zel

Manipur Legislative Assembly inthlan neih hun a hnai zel a, inthlanna felfai tak neih a nih theihna atan ngawrh taka inbuatsaih zel a ni.

Seat 60 awmna, assembly inthlan hi thawh hniha neih a ni dawn a, February 28 leh March 5-ah vote thlak a ni ang. Vote tlate hi March 10-ah chhiarin result puan a ni nghal ang.

Chief electoral officer Rajesh Agrawal chuan Ningani khan hriattirna tichhuakin, polling station zawng zawngah webcasting/videography hman a ni dawn tih a sawi.

Polling station tinah CAPF eng emaw zat dah vek niin, ASHA leh Anganwadi worker bakah volunteer pahnih zelte chu voter-te lo pui turin dah an ni bawk ang.

Voter Assistance Booth chu polling station tinah dah a ni dawn a, taksa lama harsatna nei, rualban lo leh kum upa zawkte tan vote thlak tura hruai leh thlahna bakah, wheelchair-te buatsaih a ni bawk.

Hri leng a la reh loh avangin elector-te himna atan, polling station tin chu vote thlak hma niin damdawi hmanga kah thianghlim vek a ni ang. Vote thlak nia mipui awmkhawm tam tur venna atan token system hman a ni dawn bawk a, polling party-te chu sanitizer, mask, glove, face shield leh PPE kit-te pek vek an ni dawn a ni.

Silence period, vote thlak hun tawp hma darkar 48 chhung chuan cosntituency-ah pawn lam mi political function neih khap an ni. Radio, TV leh media dang kaltlangin inthlan kaihhnawih thil tihchhuah khap a ni bawk.

Vote thlak niah candidate-te chu polling station aṭanga meter 200 huam chinah an lo tei vel phal a ni lo a, polling booth-ah security nena an luh phal a ni lo bawk. Polling booth chhungah hian presiding officer leh polling officer-I tih loh chu midang tumahin mobile an ken luh phal a ni lo bawk a ni. Hemi ni hian polling area-ah mipui hipkhawmna lam thil, musical concert, theatrical perfomance leh intihhlimna dangte buatsaih khap tlat a ni bawk.

Inthlan thawh khatnaa hman tur EVM-te thawnchhuah fel a ni tawh a, kuminah hian ṭum khatna atan Symbol Loading Unit hman a ni dawn. Hemi hmang hian candidate leh an party-te hming chu TV screen-ah tarlan a ni ang.

EVM awmna chin chhuizui zelna turin polling team member leh sector officer-te mobile phone-ah Traccar App dah vek a ni dawn bawk a ni.