Nagaland CM-in Tseminyu district thar a hawng

Nagaland chief minister Neiphiu Rio chuan Ningani khan an state-a district 13-na, Tseminyu district chu official-in a hawng ta.

Tseminyu-a Rengma Sports Assocation ground-ah district thar hawn leh lawmna hi buatsaih a ni a, Rengma hnam mi tam tak an kalkhawm a ni.

Rio chuan district thar chu an state tana hriatreng tur district a nih thu sawiin, "Rengma-te chu hnam tlemte ni mah se, Naga ram leh Naga society tan an thawh hlawk hle a ni. Rengma-te chanchin ropui tak hi kan rilruah a awm reng a ni," a ti. Mipuite chu an thlahtuten thil ropui tak an lo tih tawhte chu tunah leh ṭhangṭhar lo awm zel turten an chhunzawm zel theihna tura dahṭhatna, museum emaw siam turin a chah nghal bawk.

Tseminyu district huam chhungah hian mihring 56,108 chengin, khaw 39 bakah unrecognised village pathum a awm tih DC Dr Zasekuolie Chusi chuan a sawi. Kum 2011 chhiarpuiah khan district literacy rate chu 81.71% a ni.