Guwahati-a tlan tur electric bus 200 order dawn

Assam sorkar chuan Guwahati khawpuia tlan tur, electric bus 200 chu state sorkarin thla khat chhungin a order dawn tih a sawi.

Nikum August thla khan state cabinet chuan carbon emission tihtlemna turin Guwahati khawpui chhunga tlan tir tura electric bus 200 leh CNG bus 100 lei an lo rel tawh a ni.

Chief Minister Sarma chuan municipal board election neih tura BJP manifesto a tlangzarh rualin electric bus order a ni dawn tih hi a sawi a, urban local body inthlanah hnehna an chan chuan, an party chuan mipuite tana emission-free transport kalpui a tum tih a sawi. BJP in thuneihna a chan chuan, khawpui te zawkah pawh electric commercial vehicle-te hman an ni ang, a ti.

"Carbon emission hi khawvel pumah buaipui a ni tawh. Hei vang hian carbon emission tihtlemna turin kan theih angin hma kan la ve a, electric mode of transportation pawh hman kan tum ve a ni," tiin CM chuan a sawi.

Assam-a municipal board 80-a ward 977-ah March 6 hian inthlan neih a ni dawn a, March 9-ah vote chhiarin result puan a ni ang. State chhunga civic body election neiha a ṭum khatna turin, vote thlakna atan hian electronic voting machine (EVM) hman a ni ang.