Manipur-ah multi crore Indo-German water conservation project tlangzarh

Manipur Chief Minister N Biren Singh chuan Thawhlehni khan forest management for water resources conservation kalpuina tur Indo-German financial co-operation Project a tlangzarh.

Indo-German financial co-operation Project hi KfW, Ham­burg Germany leh Ministry of Finance, Government of India-te chuan 2017 khan an lo sign tawh a ni. Hemi bakah hian project kapuina tur dang state forest department leh KfW-te chuan inremna an lo ziak tawh bawk.

Project hian a tum ber te zingah ramngaw chereu tawh siamṭhat te, lui luang km 300 vel humhalh-a siamṭhat te, lui hnar lama awm thingtlang khuate nunphung 90%-a tihchangtlun te a tel a ni.

Kum 11 chhung vel project hi kalpui tura ruahman a ni a, cheng vaibelchhe 254 vel ruahman a ni bawk. Phase hmasa ber hi cheng vaibelchhe 137.37 senga kalpui tur a ni a, kum sarih chhung atan kalpui a ni phawt dawn a ni. Loan 90% hi a pung nen sorkar laipui rulh tur a ni a, 10% erawh hi chu state rulh tur niin kum 20 hnuah a pung 1% pawh tling lo nen rulh tur a ni ang.

Imphal-a project tlangzarhna an neihah hian Chief Minister chuan thu sawiin project tluang taka kalpui a nih chuan ramngaw an neih mek te chu humhalh a nih dawn bakah ramngaw chhe tawh hectare 21,800 chu siamṭhat leh a ni dawn tih sawiin tualchhung mipuite thlawpna erawh an mamawh dawn tih a sawi.

CM chuan project kalpui a nih hunah chuan mipui nunphung chuan hma a sawn dawn tih sawiin nungcha te tan pawh an him dawn tih a sawi a, tualchhung mite tan pawh hna a awm belh thei dawn niin a sawi. Project hlawhtling taka kalpuina tur chuan mipuite hmangaihna leh thlawpna kan mamawh a ni, a ti.

Kfw aiawh Manfred Fischer Senior Sector Specialist chuan hlawhtling taka project kalpuina tur chuan stakeholder zawng zawng te chu an ṭanrual a pawi­mawh thu sawiin an ngaihdan te pawh an inhrilh tawn fo a ngai dawn niin a sawi.