Tripura-ah Halpuah/halmawi Rs. nuai 10 hu man
Tripura-a Kaman Chowmani leh Maharaj Ganj Bazar area-ah Thawhlehni khan halpuah leh halmawi dap beihpui thlak a ni a, halpuah leh halmawi cheng nuai 10 man hu an man a ni.
Tripura State Pollution Control Board (TSPCB) chuan Laxmi Puja hman turah hian mipui punkhawmnaah leh kawngpui dungah te halpuah leh halmawi hal a khap a, thawm bengchheng siamna a nih avang leh boruak a tihbawlhhlawh avangin an khap niin an sawi.
Thupek hi khawpui leh a chhehvelah te khauh taka kenkawh a ni dawn a, lighting rockets, apti bombs, chain crackers,7 shots, kali potka, chocolate bomb leh halpuah gram 21 aia rit te chu khap zingah hian an tel a, heng bakah hian ri bengchheng siam thei hal chi reng reng chu khap a ni bawk.
Noise Pollution (Regulation and Control) (Amendment) Rules, 2009 zulzuiin TSPCB chuan thupek hi an tichhuak tih sawiin Air (Prevention and Control of Pollution) Act, 1981 leh Environment (Protection) Act, 1986-te behchhanin ri bengchheng siam theih phalzawng pawh hi an siam bawk a ni.
West Tripura district thuneitute pawhin an district huamchhungah decibel 90 aia ring bengchheng siam thei chi reng reng chu an khap thu an lo sawi tawh bawk.