Kuki helpawlin BJP vote turin mipuite chah Congress-in EC inrawlh turin a ngen

Manipur-a Kuki helpawl, Kuki National Organisation chuan kar liam ta Zirtawpni khan thuchhuah siamin, assembly inthlan lo awm turah BJP an thlawp thu an sawi.

Kuki helpawl thuchhuah leh, voter-te an vau chungchangah Congress party chuan Election Commission chu inrawlh a, action la nghal turin an ngen.

Congress chuan EC-a lehkha a thehluhah, he thuchhuah siam hi model code of conduct bawhchhiatna chiang tak a ni a, inthlanna dik leh felfai tak a awm theihna turin khauh taka action lak a ngai tih an sawi a ni.

Helpawlin mipuite chu BJP vote tura nawr leh, an thuchhuah zawm loten a nghawng an tuar ang tih thuchhuah an siam hi union home minister Amit Shah leh Manipur chief minister N Biren Singh-te hriatpui leh remtihpuina a ni, tiin Congress chuan memorandum-ah an tarlang.

Election Commission model code of conduct bawhchhiatna lian tak, thuchhuah hlauhawm tak siam chungchangah chief election commissioner leh chief electoral officer chu rang taka hma la tura an phut thu Congress chuan a sawi. KNO President thuchhuah avanga mipuia hlauhna awmte chu titawp vat turin an ngen bawk.

Manipur assembly inthlan hi thawh hniha neih a ni dawn a, vawiinah a thawh khatna hi neih a ni ang.

KNO hian sorkar laipui nen inbiakna an neih mek angin, sorkar leh BJP hruaitute chuan an buaina chu a rang thei anga chinfelsak an tiam tih a sawi. Hei vang hian inthlan awm turah BJP candidate-te an thlawp dawn a, KNO chettlatna bial chhunga chief, CSO leader leh voter zawng zawngte chu BJP candidate-te vote vek turin an ti a ni. An ngenna zawm lote chu Kuki te ṭhatna tur duh loah ngaih an nih tur thu an sawi bawk. He thuchhuah hi an pawl president, PS Haokip hminga chhuah a ni.