Tripura-ah BJP leh Congress worker intibuai

Tripura khawpui, Agartala-ah rorellai Bharatiya Janata Party (BJP) leh eptu pawl, Congress party worker-te chu Zirtawpni liam ta khan intibuaiin mi eng emaw zatin hliam an tuar. Hliam tuar zingah hian Congress hruaitu Sudip Roy Barman pawh a tel.

Party pahnihte hian buaina chhuah chhanah an inpuh tawn a, he thil thleng avang hian Zirtawpni zan aṭang khan khawpui chhungah CrPC Section 144 puan a ni. Police, TSR leh CRPF sipaite chu khawpui chhungah dan leh thupek kengkawh turin duty tir nghal an ni bawk.

Congress party chuan BJP worker-te hian Kamarpukur Par, Agartala-a induction programme an neih chu an rawn tibuai niin an sawi a, lung leh hmanraw dangte party worker bakah senior leader-te chu an bei tih an sawi. Hetih lai hian BJP chuan Congress worker-te hian an party office an suasam sak a, lungawi lohna lantira rally an huaihawt chu Congress Bhavan area-an thlenin an intibuai zui ta niin an sawi.