March 10 hnuah Amit Shah-a'n Assam leh Meghalaya CM-te hmu dawn

Union home minister Amit Shah chuan Assam leh Meghalaya te ramri chungchang chinfel dan tur sawipui leh tifel turin March 10 hnu lamah state pahnih chief minister-te hi meeting a neihpui dawn.

State pangaa assembly inthlan neih chu March 10 hian vote chhiarin result puan a ni dawn a, hemi hnu hian Home Minister ho hian ramri buaina tihfel dan tur hi an ngaihtuah dawn a ni.

Assam chief minister Himanta Biswa Sarma leh Meghalaya chief minister Conrad K Sangma-te chuan kumim kumtir lam khan New Delhi-ah Amit Shah hi an lo hmu tawh a ni. Hemi tum hian state pahnih sorkarin ramri chinfel dan tur buaipui tura a ruat, regional committee-te rawtna siamte an thehlut nghal a ni.

Union home ministry chuan state pahnih chief minister-te inthianthatna leh inhriatthiam tawnna chuan ramri buai chinfel dan ngaihtuah kawngah a pui nasa hle tih a sawi. Inremna pawh tihfel thuai theih a beiseiawm hle tih a tarlang.