Gauhati High Court leh Sikkim High Court-te'n Chief Justice thar an nei

Law Ministry thuchhuah chuan ramchunga High Court panga te chuan chief justice thar an neih thu Nilaini khan an tarlang a, heng zingah hian hmarchhak aṭangin - Sikkim leh Gauhati High Court-te pawh an tel.

Law Ministry thuchhuah chuan Uttarakhand, Sikkim, Calcutta, Gauhati leh Bombay High Court-te chuan chief justice thar an neih tur thu hi an tarlang a ni.

Uttarakhand HC judge ni lai Vijai Kumar Bist chu Sikkim HC chief justice atan ruat a ni a, Karnataka High Court judge ni lai Justice Ajjikuttira Somaiah Bopanna chu Gauhati HC chief justice a ni dawn thung.

Anni bakah hian Andhra Pradesh HC leh Telengana HC judge Justice Ramesh Rangnath chu Uttarakhang HC chief justice atan ruat a ni bawk.

Calcutta HC judge Debasis Kar Gupta chu a awmna court-ah chief justice ni tura ruat a ni bawk a, Bombay HC-a judge ni lai Justice Naresh Harishchandra Patil pawh an court-ah vek hian chief justice atan ruat a ni bawk a ni.

Tuna chief justice thar ruat an nih leh takah hian ramchhunga high court awm zawng zawng 24 chuan full-time chief justice an nei ta vek a ni.