Assam: Citizenship Bill do­daltu ten CM hmuh an duh

Assam-ah chuan Thawhlehni khan Citizenship (Amendment) Bill 2016 duh lotute chuan darkar 12 awh bandh an huaihawt a, pawl hrang hrangte an tel. Bill duhlotute hian Nilaimni khan Chief Minister Sarbananda Sonowal hmu tura appointment siam an duh thu sawiin, an buaina chungchang sawiho an duh thu an tarlang a ni.

RTI activist Akhil Gogoi chuan Chief Minister hian a hmu duh lo a nih chuan State pum huapin buaina an siam dawn niin a vau lawk. Citizenship (Amendment) Bill 2016, duhlotu te hian karkhat chhungin CM hi meeting neihpui ngei an duh thu an sawi a ni.

Gogoi chuan Joint Parliamentary Committee on Citizenship (Amendment) Bill 2016 chuan Parlia­ment thlasik ṭhutkhawm-ah report an thehlut dawn tih an hriat thu a sawi a, mahse Assam sorkar chuan he bill chungchangah hian an dinhmun an la tichiang lo niin a sawi.

Citizenship (Amendment) Bill, 2016 hi Lok Sabha-ah pharh a ni a, Citizenship Act, 1955 siamṭhatna a ni a, he Bill hnuaiah hian Hindu, Sikh, Buddhist, Jain, Parsis leh Kristian sakhaw vuantu Bangladesh, Pakistan leh Afghanistan aṭanga December 31, 2014 hmaa lutte chu khua leh tuiah an pawm thei dawn a ni. Hemi duh lo hian Assam-a pawl hrang hrang 46-te chuan bandh an huaihawt a ni.