Manipur : Inthlan thawh khatna neih a ni

Manipur Legislative Assembly inthlan thawh khatna chu nimin khan assembly constituency 38-ah neih a ni.

District panga huam chhunga constituency 38-ah inthlan hi Covid-19 protocol khauh taka kengkawh chunga neih a ni. Zing dar 7 aṭangin vote thlak ṭan a ni a, tlai dar 4 thleng hun hawn a ni. Covid positive-te tan tlai dar 3-4 inkarah vote thlak hun hawnsak an ni bawk.

Vote thlak hmasa zingah chief minister N Biren Singh leh governor La Ganesan te an tel. Chief Minister leh a nupui chuan Imphal East district-a Hiengang constituency-a model polling station-ah vote an thlak a, Governor hian Imphal West district-a Sagolband biala TG Higher Secondary School-a polling booth-ah vote a thlak.

Vote thlakna polling station 1,721 siam a ni a, vote nei hi mi 12,09,439 an awm bawk. Inthlan buaipui tur hian mi 6,884 ruat an ni.

Seat 38 zinga 10 hi Imphal East district-a mi niin, Imphal West-ah 13, Bihsnupur leh Churachandpur-ah seat paruk ve ve leh, Kangkokpi district-ah seat pathum a awm.

Bial 38-ah hian candidate 173 an awm a, an zingah hmeichhia 15 an tel. Candidate zingah hian criminal case nei mi 39 an awm.

BJP chuan bial 38-ah hian candidate a siam vek a, Congress-in bial 35-ah, NPP-in 27, JD(U) in 28, Shiv Sena-in pasarih, RPI (Athawale) in paruk, LJP (Ram Vilas) in pathum, Kuki National Assembly leh Kuki People's Alliance-in pahnih ve ve bakah independent candidate 18 an awm bawk.

March 5-ah assembly constituency 22-ah inthlan thawh hnihna hi neih a ni dawn a, assembly seat 60-a inthlan result hi March 10-ah puan a ni ang.

Inthlan kaihhnawihah tharum thawhna ṭum 46 a thleng
People's election monitoring team, Youth Collective Manipur (YCM) chuan tun ṭum assembly inthlan neih tur kaihhnawiha pawikhawihna ṭum 46 a thleng tawh niin a tarlang.

YCM report chuan pawikhawihna ṭum 46 thlengah hian mi pali an thi a, bomb puak ṭum 10, silai hmanga pawikhawihna ṭum 15, midang thil neih suasam sakna ṭum 19 a tel tih an sawi. Hei bakah hian hel pawlten political party thlawp bik nei a, vote tura mipuite an vauna pawh a awm tih an sawi bawk.

Campaign laiin sum, ruihhlo leh zu sem pawh a tam hle tih YCM chuan a sawi. Election Commission of India (ECI)-in official-te thil man a tarlanah, February 25 thleng khan ruihhlo Rs vbc 143.47 hu, zu Rs nuai 65 hu, therhlo dang Rs vbc 12.17 hu leh pawisa fai Rs vbc 4.17, a vaiin Rs vbc 167.83 hu an man tawh bawk.

Congress-in BJP thlawp vangin an party candidate suspend
Congress party chuan inthlan neih hma lawkin Wangoi constituency-a an party candidate, Salam Joy Singh chu BJP candidate Oinam Lukhoi Singh a thlawp avangin an suspend.

Congress party hian Wangoi biala an party worker leh hruaitu hrang hrangte hnen aṭanga complaint an dawn hnu leh, Salam Joy Singh-a'n BJP candidate a thlawp thu a sawina video te social media lama a darh avangin, Pathianni khan party member a nihna aṭangin an hnawtchhuak a ni.

Wangoi bialah hian candidate pathum, BJP candidate Oinam Lukhoi Singh, NPP candidate Khuraijam Loken Singh leh Congress candidate Salam Joy Singh te an awm.

Imphal East-ah JD(U) candidate silaiin kap
Imphal East district-ah Inrinni zan khan mi tu tih hriat lohten JD(U) candidate Wanglembam Rojit Singh chu silaiin an kap a, a awmah hliam tuarin damdawi-in panpui nghal a ni.

He thil hi zan dar 11.30 vela thleng a ni a, Kshetrigao assembly constituency-a JD(U) candidate hian Naharup Makhapat-ah an party worker ṭhenkhatte a hmuh laiin two-wheeler-a chuang mi pahnih rawn kalin, pakhat zawkin silai hian a rawn kap a ni.

Police-te chuan FIR an ziak lut nghal bawk a ni. Nimina inthlan thawh khatna neihna zingah Kshetrigao assembly bial hi a tel a ni.