Arunachal a intodelh a hun tawh : CM Pema Khandu

Arunachal Pradesh chief minister Pema Khandu chuan Arunachal Pradesh state chu a intodelh a hun tawh tih sawiin, an mamawh zawng zawnga sorkar laipui an rinchhanna chu tihtawp a hun tawh a ni, a ti.

CM chuan nau piang hlim chu a mamawh zawng zawng a nu leh pain an ngaihtuah sak a, an chungah a innghat vek a ngai a, mahse a lo puitlin chuan nu leh pa rinchhan ngawt loin amahin a intungnung chho tawh a ni, tiin a sawi. "Union territory kan nih aṭanga chhiar chuan kum 50 kan ni tawh a, state kan nihna ṭanga chhiar pawhin kum 36-a upa kan ni tawh. A eng zawk pawh hi ni se puitling tak tak kan ni tawh a, ei leh bar, inrelbawlna kawngahte pawh midang rinchhan loa kan intodelh a hun tawh a ni," tiin Kurung Kumey district-a Jyokum Yullo lawmna a hmanpuinaah a sawi.

Economy lama intodelhna turin Arunachal chuan theihna sang tak a nei a, tourism, hydropower, agriculture leh horticulture, mineral leh natural resources-te chu sum lakluhna ṭha takah an siam thei vek tih CM chuan a sawi a, hemi atan hian state mitinte chuan theihtawp an chhuah a ngai a ni, a ti.