Assam-ah Citizenship Bill duh lohna lantir leh dawn
Assam Citizenship (Amendment) Bill 2016 duh lotu pawl hrang hrang intelkhawm te chuan November 5 aṭangin bill duhlohna lantira nawrh huaihawt leh an tum thu an sawi.
Heng pawl hrang hrangte hian bill hi pawm a nih a, kaltlangpui a nih chuan ram leilung fate chu an ram ngeiah hnam tlem zawk an ni thei dawnin niin an tarlang. Assam-a loneitu pawl hruaitu leh RTI activist lar tak Akhil Gogoi chuan Assam leh hmarchhak mipuite chuan Citizenship Bill chu an duh loh thu a sawi a, ram leilung fate nekchep theitu bill a nih thu a sawi.
Gogoi bakah hian pawl hrang hrang 60 aiawh te chuan Inrinni khan joint press conference an nei a, heng pawl hrang hrang aiawhte hian thusawina hun te neiin November 5 aṭangin duh lohna lantir leh turin thutlukna an siam a ni.
RTI activist te chuan Citizenship (Amendment) Bill, 2016 chu Joint Parliamentary Committee (JPC) hnuaia ngaihtuah chhuah a nih thu an sawi a, hemi avang hian hemi chungchanga hriattirna tihchhuah chu dan kalh a nih thu an sawi. BJP leh a kaihhruai NDA sorkar chuan Assam leh hmarchhak chu tihbo an tum a ni, an tibawk.
Gogoi-a kaihhruai Krishak Mukti Sangram Samiti (KMSS) te, Asom Jatiyatabadi Yuva Chatra Parishad (AJYCP) leh pawl dang eng emaw zat chuan Citizenship Bill hi an duh lo hle a, October 23 pawh khan state pumah hemi duh lohna lantir hian bandh an lo huaihawt tawh a ni.
Gogoi chuan BJP leh RSS-ten Hindu Bengali-te dinhmun Assam-a tingheh an tum dan chu pamphlet-a sem an tum thu sawiin mipuite chu Citizenship Bill dinhmun diktak hrilhhriat an tum thu a sawi a ni.
Bill duh lotu pawl hrang hrang te hian November 3 hian bill duh lohna lantir dan tur ngaihtuahin meeting an nei leh dawn a ni.