Meghalaya Congress in HNLC hruaitu inpek dan chhui phut

Meghalaya hel pawl Hyn­niewtrep National Libera­tion Council (HNLC) general secretary Cheristerfield Thang­khiew sorkar kuta a inpek dan chu eptu pawl Congress chuan chhuichian an phut thu an sawi.

Opposition leader Dr. Mukul Sangma chuan hel zinga man an duh ber pawl sorkar kuta a inpe ta mai chu chhuichian an phut thu sawiin sorkarna siam lai NPP kaihhruai MDA sorkar leh investigating agency-te chu chhuichiang tura an phut thu a sawi a ni.

Chief minister hlui Mukul Sangma chuan hun kal tawh zawng zawngah khan HNCL-te hi politician ten inbiakna an kalpui em tih hriatchhuah a ṭul tih sawiin hel pawl nena inbiakna kalpui tur hian tumahin zalenna an nei lo tih chu danin chiang takin min hrilh a ni, a ti. Hemi anih avang hian sorkar leh investigating agency-te chuan chhuizui ngei se keini Congress party te chuan kan duh a ni, a ti bawk.

Mukul Sangma chuan Deputy Chief Minister Tynsong chuan inbiakna a neihpui fo em tih a hriat duh thu a sawi a, sorkar siam a nih hnu khan an inpek tir thu sawiin an insawi lian ṭan hle niin sorkar chu a puh. Hel an man tak chu Tynsong chuan inbiakna a neihpui ṭhin em tih chu hriatchhuah a ṭul takzet tih sawiin inthlanah pawh khan an lo hmang ṭangkai tawh reng em tih hriatchhuah a ṭul thu a sawi.

Sangma chuan political department chauh chu hel pawl te nena inbiakna kalpui thei an nih thu sawiin Home(police)-te pawhin thuneihna an nei lo tih a sawi. Chu dan ding lai chu hmansual a nih lohna turin mi zawng zawngin an zawm tur a ni tih a sawi bawk.

HNCL general secretary hi October 18 khan Deputy Chief Minister, Prestone Tynsong hma­ah Shillong-a police head­quarters kutah a inpe a ni.