Tripura CPI(M) member 20 in hliam na tuar

Tripura-a eptu pawl Commu­nist Party of India-Marxist (CPI-M)-ten Inrinnia kawng an zawhnaah BJP activist ten lunga an lo vawm avangin CPI-M member 20 vel chuan hliam na tak an tuar.

CPI-M-te hian ‘Jan Adhikar Mancha’ rally zawmin, Joint Parliamentary Committee (JPC) chu Rafale deal chhuichian tir leh Defense Minister Nirmala Sitaraman bang tura phutna kawngzawh an nei a ni.

Inrinni-a CPI-M beih zingah hian MLA hlui Basudeb Majumder, TTAADC Executive Member Parikshit Murasingh leh Tapas Dutta-te pawh an tel. MLA Badal Choudhury chuan an kawngzawh lo beitute chu July 24-a Udaipur-a beihna thlenga lo beitute ai khan a letin an tam tih sawiin ramchhung hmun hrang hrangah hetiang hi a thleng fo niin a sawi.

Hetihlai hian BJP lam chuan CPI-M-ten an bei nia an puhna hi an pha thung a, eptu poltical party te beih chu an tihdan phung a ni lo tih a sawi thung. He thilah hian an party chuan inhnamhnawihna an nei lo tih BJP thupuangtu Ashok Sinha chuan a sawi a ni.

CPI-M-te hian police hnen­­ah he thil thleng avang hian complaint an thehlut a, an complaint thehluhah hian BJP activist 14 he inbeihnaa inhnam­hnawih an hmuh te hming pawh an ziak lang nghe nghe a ni. Mahse police te chuan he thu ziah lai thleng hian tumah man an la nei lo thung.