Assam CM-in North East Green Summit hawng

Assam chief minister Sarbananda Sonowal chuan Thawhṭanni khan ni thum awh tur, 5th North Green Summit chu IIT, Guwahati-ah a hawng. 

He summit hi Vibgyor N.E. Foundation, IIT Guwahati leh United Nations Envi­ronment thawk hoin an buatsaih a ni. 

Sarbananda Sonowal chuan a kaih­hruai sorkarin an state-a environment humhalhna tura a hmalak dan te a sawilang a, state chhung hmun hrang hrangah thing ṭiak vaibelchhe 10 phun an tum thu te a sawi. Environment humhalhna kawnga an  hmalakna pawh a hlawhtlin chhoh zel thu te, tun thlengin thing ṭiak vaibelchhe riat chuang an phun tawh thute a sawi bawk. 

Summit-a tel policymaker, environ­mental NGO, reseacher, academician, politician leh midangte chu leilung humhalh chhoh zel a nih theihna tura hmalakna tur, roadmap te pawh buatsaih turin CM chuan a chah nghal a ni. 

Prime minister Narendra Modi-a'n hmarchhak bial organic hub-a siam tura hmathlir a neih dante sawichhuakin, Sonowal chuan hmeichhe rethei zawkte hnena a thlawna LPG connection pekna, Pradhan Mantri Ujjwala Yojna scheme siam a nih vangin PM chungah a lawm thu a sawi. Hei hian an harsatna ṭhenkhatte a sutkian sak dawn bakah, eirawngbawlna atana hman tura thing kih ṭhin pawh a tihtlem phah ngei ang, a ti. 

Summit-ah hian Union MoS for food Processing Rameswar Teli, Commerce and Industries Minister Chandra Mohan Patowary leh Manipur MP Rajkumar Ranjan Singh-te pawh an tel a ni.