Meghalaya Cabinet-in “One time tax” tihpun pawm

Meghalaya Cabinet chuan state Transport department-in lirthei ṭhenkhata “one time tax” tihpun a rawtna chu a pawm.

Meghalaya Deputy Chief Minister, Prestone Tynsong chuan Thawh­lehni khan cabinet mee­ting an neih zawh hnuah lirthei a man pangai cheng nuai thum man thlengah one time tax chu 4%-a tihpun rawtna awm chu an pawm tih a sawi.

Prestone Tynsong chuan liethei nuai thum man aia tamah chuan one time tax chu 6%-a an tihpun dawn thu a sawi a, lirthei cheng nuai 15 leh nuai 20 inkar manah chuan 8% in an tihpun dawn thu a sawi bawk. Liethei cheng nuai 20 man aia sangaha chuan 10% in an tipung dawn tih a sawi bawk a ni.

Tynsong chuan annual revenue pawh hemi avang hian cheng vaibelchhe 22 aṭangin vaibelchhe 23-ah a pung dawn tih a sawi bawk.

Cabinet ṭhukhawm hian Meghalaya State Electricity and Regula­tory Commission (MSERC)-a commission member pahnih ruat tura rawtna pawm pawh an pawm bawk a ni.

Heng bakah hian Taxation department in state chhunga event buatsaih reng renga a buatsaihtu te fee khawn rawtna a thlen pawh chu an pawm bawk.

Tynsong chuan Taxa­tion department rawtna angin mipui 2000 aia tam punkhawmnaah chuan ni khatah fee 25,000 an khawn dawn thu a sawi a, mipui 2000 aia tlemnaah chuan cheng 20,000 an khawn dawn thung tih a sawi.

Tynsong chuan sorkar chuan “Super Mega Event” pharh an tum thu a sawi bawk a, mi 5000 aia tam awmnaah chuan ni khat­ah fee chentg nuai khat an la dawn tih a sawi bawk.

Cabinet chuan Seri­culture and Weaving department, Department of Textiles tia thlak tura rawtna awm chu an pawm bawk a ni.