Manipur election : Inthlan thawh khatnaah vote 78.03% a tla

Manipur Legislative Assembly inthlan thawh khatna, Thawhṭannia neihah vote 78.03% a tla.

Inthlan thawh khatna hi assembly bial 60 zinga bial 38, district panga huam chhungah neih a ni.

Imphal West district-ah vote tla ṭha berin 82.19% a tla a, Kongkokpi district-in dawtin 76.64% a tla.

Vote thlak ni hian hmun hrang hrangah buaina tenau chhuak report a awm. Churachandpur district-ah political party pahnih worker-te an intibuai a, Imphal East, Imphal West leh Kangkokpi district-ah pawh buaina chhuak a awm bawk. Mahse security force-te chuan an buaina chhuakte hi an thunun thei hlawm a ni.

Chief electoral officer (CEO) office chuan Saikul, New Keithelmanbi, Maite leh Tinsuong, Lonom, Geltam leh Maukot-ahte mi ṭhenkhatin EVM an tihchhiat thu sawiin, FIR pawh thehluh nghal a nih thu a tarlang. Heng EVM-te hi a thara thlak nghal an ni tih a sawi bawk.

Political party leh candidate ṭhenkhat complaint thehlut an awm thu CEO Rajesh Agarwal chuan a sawi a, mahse an buaina tam zawk chu chinfel nghal a nih thu a sawi. Vote thlak ṭhat phut chungchangte erawh ngaihtuah ṭhat a ni ang, a ti.

Congress party chuan an state president N.Loken Singh dinna, Namboi constituency-ah an polling agent chu BJP worker-ten vauin an hreng a, hei bakah mipuite pawh BJP vote turin an nawr lui bawk tih an sawi. Hei vang hian he bialah hian vote thlak ṭhat an phut.

BJP leh Congress candidate leh hruaitute chuan party election booth inkhawih sak leh tharum thawhna thlenah an inpuh tawn a ni. Keira biala National People's Party candidate motor chu an khingpui party worker-te an tihchhiat sak bawk

Official-te chuan assembly consituency pathum - Saitu, Henglep leh Singhat-ah buaina chhuak vangin security force-ten silai an hmehpuah a ngai niin an sawi.