Nagaland HM-in Covid-19 Hospital a hawng

Nagaland health & family welfare minister S.Pangnyu Phom chuan Thawhṭanni khan District Hospital, Dimapur-a khum 50 awmna Covid-19 Hospital a hawng.

Minister chuan Covid-19 hri leng chu state sorkar chuan a theihtawpin a do let a, thawktu leh an hmun neihte, an hmanrua neih ang angin an bei tih a sawi. Hri dona kawnga pawimawh leh mamawh tak pakhat chu hospital a nih thu sawiin, hmanrua changtlung tak nena thuam chuan damlote pawh a hun takah enkawlna ṭha an dawn theih phah ṭhin a ni, a ti. Hetianga hospital an din theihna tura bul tum saktu Novo Nordisk Foundation, Denmark chungah leh, mega project kalpuina tura Dimapur district an thlan avangin sorkar laipuia Principal Scientific Adviser officer chungah lawmthu a sawi bawk.

Health Services director Dr K Vikato Kinimi pawhin thu sawiin, he institution hi Nagaland mipuite tan a ṭangkai dawn hle a, ṭha taka an enkawl tur thu a sawi. Dimapur DC Rajesh Soundararajan chuan Dimapur chu sumdawnna hmunpui leh mihring pawh an bitna hmun a nih thu a sawi a, Covid hri leng pawh an tuar nasa a, mahse sorkar leh thuneitute puihnain hri leng do hna hi ṭha tak in an thawk thei tih a sawi. Novo Nordisk Foundation chungah lawmthu sawiin, hun lo kal zel turah pawh thawhhona ṭha tak an neih zel a beisei thu a sawi.