Manipur police ten Oct 20 bomb puak thubuaiah mi paruk man

Manipur-a Imphal West district police te chuan October 20-a Nagamapal-a Bomb puak thubuaiah mi paruk an man a, an man zingah hian National Identity Protection Council (NIPCO) president pawh a tel nghe nghe.

Thudawnna in a tarlan dan chuan NIPCO president, Oinam Premjit leh a nupui Oinam (O) Pinky-te chu Pathianni zan khan an chenna in Nambol Oinam-ah man an ni a, anni bakah hian NIPCO office bearers dang pawh man an nih thu tarlan a ni a, an pawl secretary Sahabudin Cheshaba bakah Khaidem Sana leh Yulembam Milan-te pawh man an nih thu tarlan a ni bawk.

Police te hian beihpui an thlaknaah hian pistol pathum leh silai mu eng emaw zat pawh an man tel nghe nghe.

Bomb puak thubuai an chhuizuinaah hian Thawhṭanni khan NIPCO office, Keishampat junction ami pawh an dap a ni.

NIPCO office hi additional SP I/W (Ops) Krishnatombi leh city police officer-in-charge, Ingocha-te kaihhruaina hnuaiah dap niin zing dar 10 aṭanga tlai dar 5 thleng an dap niin an sawi.

October 20 khan Manipur-a Nagamapal-ah bomb a puak a, hetah hian CRPF sipai pakhatin nunna a chan bakah hliam na tak tuarte pawh an awm a ni. Bomb hi engvanga tihpuah nge tih hriat a la ni lo thung.