AP-ah tuilian thut thei

Arunachal Pradesh Disaster Manage­ment Department chuan Thawhlehni khan thuchhuah siamin China-a Yarlung Zangbo lui hrulah leimin a awm avangin tunkar chhungin tui a lian thut thei niin an sawi.

Yarlung Zangbo hi India chinah hi chuan Siang emaw Brahmaputra emaw tia hriat a ni thung.

Hill state-a Disaster Management Department chuan Siang lui chhehvela cheng te chu fimkhur tura chahin sangha man leh tuichen te pawh ti rih lo turin an chah a, mipuite chu fimkhur turin an chah bawk.

Heng luia tui awmdan enfiah tur Central Water Commission (CWC) chuan Tuting-ah chuan Siang lui hi Thawhṭanni aṭang khan a kam deuh ṭan tih an tichiang tawh nghe nghe.

Leiminin tui luanna a dan avang hian tui hi a kam ṭhin a, tui hi sah a nih leh velah tui a lian vak ṭhin nia tarlan a ni.

Senior CWC officer chuan CWC Upper Brahmaputra Division chuan Chinese thuneitute hnen aṭangin Thawhṭanni khan lehkha an dawng tawh tih a sawi a, tun dinhmunah erawh chuan hlauhthawn tur a awm rih lo niin an sawi.

Tibet vur tui aṭanga insiam Yarlung Zangbo hi China-ah luangtlangin India a rawn lut a, Bangladesh aṭangin Bay of Bengal-ah a luanglut leh a ni.