ULFA in LS inthlan hmaa inremna siampui turin sorkar laipui nawr
Assam Tribune-in a tarlan danin Assam-a hel pawl United Liberation Front of Assam (ULFA) chuan Thawhlehni khan sorkar laipui chu Lok Sabha inthlanpui hma ngeia inremna siampui turin an nawr.
ULFA general secretary Anup Chetia kaihruaina hnuaiah Raju Baruah, Chitraban Hazarika leh Shasha Choudhury-te chuan sorkar laipui aiawh, AB Mathur leh Home Ministry senior official-te an thil ngiat chungchang hi an sawipui niin a sawi.
Report chuan inremna ziah tihkhawtlai a nih vangin ULFA lam chuan an lungawi loh tih an sawichhuak tih a tarlang a, nakkum Lok Sabha inthlan hma ngeia inremna mumal tak memorandum of settlement (MoS) siam ngei an duh bawk nia tarlan a ni.
Anup Chetia chuan an thil phut chungchangah leh state chhung politics dinhmun vangin sorkar laipui an bia tih a sawi a, inremna ziah an ngiat chungchang pawh sawilangin inremna ziah satliah an duh loh thu leh inremna awmze nei tak siam an duh thu a sawi bawk.