Manipur CM in hmeichhe bazar hawng

Manipur Chief Minister N Biren Singh chuan Thawhlehni khan Tamenglong district-a Senapati-a hmeichhe bazar siam thar chu a hawng.

Chief Minister Biren Singh hian Paomata leh Senapati-a doctor leh zirtirtute transit accommodation tur te, Karong leh Senapati-a water supply scheme tur te, hostel khum 100 awmna tur leh Residential School room pariat tihchangtlunna tur bakah Senapati public ground-a mini stadium sakna tur lungphum te a phum bawk.

Multipurpose Indoor Sta­dium-a vantlang pungkhawm hmaa thu a sawinaah Biren Singh chuan hmeichhe bazar sak tur thu chu kum 2017 Barak festival-a an lo puan tawh thu a sawi.

Prime Minister Narendra Modi-a slogan, ‘Sabka Saath Sabka Vikas’ chu an state inkaihhruaina pawh a nih thu a sawi a, an sorkar chuan thu sawi vak vak aiin hmuh thei ngei tura a taka thawh lam an uar zawk dawn thu a sawi bawk.

Inkalpawhna lamah pawh hmasawnna a awmna turin Imphal leh Jiribam, Tamenglong leh Moreh inkarah helicopter an service tir tawh thu a sawi a, heng thu a sawi hnu hian Rani Gaidinliu Women’s Market hi a hawng a ni.

Chief Minister chuan sorkar laipuiin Hill Area Development Fund, Tamenglong district-ah an kalpui dawn thu sawiin development fund atan hian cheng vaibelchhe 90 an dawn dawn thu a sawi bawk.

Rani Gaindinliu Women’s Market lungphum hi nikum November 15 khan phum a ni a, Manipur Police Housing Corpo­ration Limited chuan bazar sak hna hi thawkin One Time Special Assistance of Central Plan Scheme 2017-2018 hnuaiah hna hi thawh a ni a, cheng vaibelchhe 10 an seng a ni. Bazar-ah hian hmeichhe 200 tan thil zawrhna hmun a awm a, a chhawnga sak a ni.