ULFA hel nia hriatten mi panga kaphlum

Assam-a Tinsukia district-ah Ningani zanah ULFA(I) hel pawl ni ngeia hriat ten mi panga an kaphlum.

Police-te chuan ULFA(I) hel ngeia hriat mi paruk te chuan Tinsukia district-a Dhola’s Kherbari thingtlang khua aṭangin mi panga an hruai chhuah thu sawiin heng mi panga te ruang hi an hruaichhuahna aṭanga hla vak lo, lei hnuaiah chhar a nih thu an sawi.

Police officer chuan kahhlum an nih thu a sawi a ni.

Assam Chief Minister Sar­bananda Sonowal chuan tual­thahna rapthlak tak chu a dem thu sawiin pawisawi lo nunna lak chu a dem thu a sawi a, pawi khawihtute chu hrem an ni ngei dawn niin a sawi bawk.

Pawikhawihna thlenna hmunah hian minister pahnih an kal nghal a ni.

Assam police chief Kuladhar Saikia chu ruang hmuhna hmunah hian kal nghal tura hriattir a nih thu tarlan a ni a, police te chuan hel pawlin an kahhlum tak te hi Bengali community ami te an nih thu an sawi.

West Bengal Chief Minister Mamata Banerjee chuan nimin khan tualthahna chu a dem thu sawiin Assam sorkar beihnan a hmang zui bawk a, rawng taka mi panga thah an ni chu NRC hrinchhuah a ni em tih a ngaihtuah tih a sawi a ni.

Trinamool Congress chief chuan tualthah duh lohna lantirna tur hian north leh south Bengal, Siliguri leh Kolkata telin nimin khan kawngzawh huaihawt a tum thu a sawi.

Mi panga lai kahhlum an nih chungchangah hian United Liberartion Front of Assam- Independenr (ULFA-I) te chu rinhlelh ni mah se ULFA lam hian engmah thuchhuah an la siam lo thung a ni.