ULFA in Citizenship Bill chungchangah sorkar vau

Assam-a hel pawl United Liberation Front of Assam-Independent (ULFA-I) chuan Citizenship (Amendment) Bill chungchangah sorkar vauin bill hi kaltlang luih pui a nih chuan boruak a chhe zual sauh dawn tih sawiin Assam chu a kang mai dawn a ni, an ti.

ULFA general secretary, Anup Chetia chuan Tinsukia inthahna thleng chungchanga sorkar nen an inbiaknaah sorkar laipuiin Citizenship (Amendment) Bill a kalpui tlang lui a nih chuan boruak chu a chhe zual hle dawn tih sawiin a vau a ni.

Inremna zawnga inbiakna kal mek chungchang pawh sawiin a hmawr an bawk ṭep tawh chu tihsukuk tum an awm ṭeuh niin a sawi bawk.

Chetia chuan bill chu pawm a nih chuan Assam chu a kang dawn tih a sawi a, Parliament-ah bill chu an pawm a nih ngat chuan boruak a chhe hle dawn nia sawiin ULFA(I) pawh an inlak belh ṭeuh dawn niin a sawi.

Tinsukia-a Bengali mi panga thah an nih chungchang sawiin Chetia chuan Ninagni kalta zana thil thleng chu pawi a tih thu leh, mi rethei zawk te chu bitum an nih thu a sawi a, police-te chuan ULFA-te chu he pawikhawihna thlengah hian puh mah se Chetia chuan an tih a nih loh thu a sawi a ni.

Anup Chetia chuan political hruaituten an puhna chu a dem thu sawiin BJP MLA Shiladitya Deb pawh state chhung boruak tichhiaah puhin a dem thu a sawi.

Tinsukia inthahna thleng thubuaiah hian ULFA leader Mrinal Hazarika leh Jiten Dutta-te chu Zirtawpni khan man an ni a, Chetia chuan eng thuchhuah pawh siam mah se heng mite hi an inrawlh loh thu a sawi a ni.

Citizenship (Amendment) Bill, 2016 hi la tihkhawtlai rih a ni a, he bill hnuaiah hian minority community- Hindu, Parsis, Sikh, Christians leh Buddhist, Pakistan, Afghanistan leh Bangladesh mite chu khua leh tui nihna pek a ni thei dawn a, hei hi Assam leilung fate chuan an duh lo hle a, 1985 Assam Accord palzutna niin an ngai a ni.