Tinsukia tualthahna thleng duh lohna Bandh huaihawt Bengal-ah Congress in ‘Black Day’ hmang

Kar liamta Ningani-a Assam-a Tinsukia-a Beng­ali mi panga thah an nih duh lohna lantir nan Inrinni khan Assam-ah darkar 24 bandh huaihawt a ni.

Bandh hi All Assam Bengali Yuba-Chatra Pa­rishad kaihhruaina hnuaia huaihawt niin Ben­gali orga­nization hrang hrangin an thlawp. Bandh nia dawr inhawng ṭhenkhat khar luih­tir tumna kawngah hian Cong­ress MLA pakhat chu man a ni nghe nghe a, cen­tral leh southern Assam-ah chuan nunphung a buai hle.

Hetihlai hian Assam hmun ṭhenkhatah chuan Bandh hian nghawng a nei vak lo niin report ṭhenkhat chuan an tarlang.

Ningani-a Tinsukia-a Bengali panga thah an nih vang hian West Bengal Congress hruaitute chuan Inrinni kha 'Black Day' atan an puang a, sorkar laipui chu BJP kaihhruai Assam sorkar titawp turin an duh thu an tarlang bawk.

Congress president Somen Mitra chuan tualthahna chu an dem thu sawiin an demna thu chu sawichhuah a harsa zawk niin an sawi a, hetiang tualthahna thleng hian Assam chauh a tibuai lo a, a ṭhenawm state-te pawh nasa takin a tibuai niin a sawi.

1983-a Assam genocide chungchang sawi chhuak bawkin hetiang thil ang deuh chiah a thleng leh chu an dem thu leh, Assam sorkar mai ni lo BJP kaih­hruai sorkar laipui chu he thilah hian an inrawlh ve nia a ngaih thu a sawi bawk.

Tinsukia tualthahna thleng hi Assam Chief Mi­nister Sarbanada Sonowal chuan a dem thu sawiin pawikhawihtu chu man an nih ngei dawn thu leh hrem an nih ngei dawn thu a lo sawi tawh a, Union Home Minister Rajnath Singh pawhin Bengali mi panga thah an ni chu a dem thu sawiin pawikhawihtute chuan thil atthlak tak an tih thu a sawi.

He tualthahnaah hian ULFA-I-te chu mawhphurtu an nih thu Assam police-te chuan sawi mah se ULFA-te hian an pha thung a ni.