Assam sorkarin thla 6 dang AFSPA pawtsei

Assam sorkar chuan sipai hnena thuneihna sang zawk pekna dan, Armed Forces (Special Powers) Act, 1958 chu February 28 aṭanga chhiarin, an state pumah thla ruk dang a pawtsei.

He dan hnuaiah hian sipaite chuan warrant nei kher loin beihpui an thlak theih bakah an mi rinhlelh zawngte an man thei a ni. Sipaiten operation an kalpui dik tawk loh chungchangah pawh he dan hian eng emaw chen a hum bawk a ni. Hei vang hian AFSPA hian sawisel a hlawh hle a, dan sakei ti tea sawi a ni ṭhin.

Thawhlehni khan Assam sorkar chuan thla ruk dang AFSPA pawhsei a nih thu hi sawiin, "Thla ruk liamta chhunga Assam state chhung dinhmun, dan leh thupek dinhmunte ennawn a nih hnuah, state sorkar chuan 28/2/22 aṭanga chhiarin state pum chu Disturbed Area-ah thla ruk dang a puan chhunzawm a ni," a ti.

Assam sorkar hian nikum August 28 khan thla ruk atan AFSPA hi a lo pawtsei tawh bawk a ni.

Kum 1990, November thlaah Assam-ah AFSPA hi hman ṭan a ni a, thla ruk danah state sorkar chuan an state dinhmunte ennawnin, a pawtsei chhunzawm chho ta zel a ni.

Kumin January 1 khan chief minister Himanta Biswa Sarma chuan Assam aṭangin district panga tih lohah chuan sipaite hi lakchhuah an ni thuai dawn tih sawiin, AFSPA chungchang ngaihtuah leh hunah pawh state sorkar chuan thutlukna ṭangkai tak a siam tawh dawn tih a sawi. "AFSA chungchangah hian kum 2022-ah chuan Assam hian awmze neia hmalakna a hmu tawh dawn a, mahse eng hunah nge tih erawh kan la sawi thei lo. Mahse kum 2022 hi beiseina sang tak nen kan thlir a, AFSPA chungchangah a ṭha lam zawnga thil a thlen chhoh ngei kan ring a ni," tiin a lo sawi a ni.

AFSPA hmang hian sipaiten civil mite dikna chanvo nasa takin an palzut sak nia sawiin, Assam bakah hmarchhak state danga he dan hman meknaahte chuan civil society group leh right activist-te chuan he dan tihtawp hi an lo phut fo tawh a ni. Nikum December 4-a security force-ten beihpui an thlak ṭuma Nagaland-a Oting khuaa civil mi 14 an kahhlum hnuah phei chuan AFSPA duh lohna leh, he dan hlip tura sorkar laipui phutna pawh a nasa zual hle.