Assam-Meghalaya border chungchangah Home Ministry-in meeting nei dawn

Assam leh Meghalaya state ramri buaina neih mek chungchangah, March 9 hian Ministry of Home Affairs chuan statekholder-te meeting a neihpui dawn tih Meghalaya chief minister Conrad K Sangma chuan a sawi.

MHA hian state pahnih sorkarten ramri buaina chinfelna tura rawtna an siamte an thehluh hnuah, meeting hi a ko a ni.

Assam leh Meghalaya hian state ramri hmun 12-ah buaina an nei mek a, mahse a thawh khatna atan hmun paruka an buaina neihte chinfel tumin hma an la hmasa a ni. Cabinet minister-te kaihhruai regional committee-te an din ve ve a, anni hian ramrite hi tlawhin, ramri hrula khaw mite an kawm a, hemi hnu hian an state sorkarah ve ve report an thehlut leh a ni. State pahnih cabinet chuan heng report-te hi an pawm tawh bawk.

Ramri buaina chinfelna tur hian chief minister pahnihte hian 'give and take' policy hman an tum a ni. A thawh khatnaa an chinfel tur, buaina an neih mekna hmun paruk hi square km 36.79-a zau a ni. Give and take policy hmanga inremna siamna tur an duanah hian Assam lamin sq km 18.51 changin Meghalaya lam hian sq km 18.28 a chang thung dawn a ni.