Nagaland : Sorkar laipuiin a remtih hunah SIT report tichhuak dawn

Nagaland chief minister Neiphiu Rio chuan nikum December thlaa army para-command-ten civil mi 14 an kahhlum chungchang chhui tura state sorkarin a din, Special Investigation Team (SIT) report chu sorkar laipuin rem a tih hunah mipuite hriatah puanzar a ni dawn tih a sawi.

Mon district-ah Oting biala civil mite kahhlum an nih hnuah state sorkar chuan thil thlen dan chhui chiang turin SIT hi a din nghal a, ni 30 chhunga report thehlut tura tiin a hun pek hi January 5 khan a tawp a ni. Chief Minister chuan investigation team report hi state sorkar chuan a dawng tawh tih a sawi a, hetihlai hian he report hi mipui hriata puangzar turin pawl hrang hrangin sorkar hi an nawr a ni.

Chief Minster chuan investigation team report hi state sorkar chuan a dawng vek tawh tih a sawi a, SIT hian Oting biala thil thleng chungchanga mawhphurtua puhte lakah pawh thubuai a ziak lut dawn a ni. Mahse hemi atan sorkar laipui phalna an neih phawt a ngai a, phalsak an nih hunah report pawh hi puanzar a ni ang, tiin Rio chuan a sawi.

Nikum December 4 leh 5 khan security force-te silai hmehpuahah civil mi 14 an thi a, he thil thleng hian dem a hlawhin, Nagaland-a sipai thuneihna sang pekna, Armed Forces (Special Powers) Act hlih phutna pawh a nasat phah hle.

Union home minister Amit Shah chuan Lok Sabha-a he thil thleng chungchang a sawifiahnaah, army chuan Mon district-ah helho an kal tih thu an dawn vangin December 4 khan ' 21 Para Commando ' unit tirin an lo chang tih a sawi. Motor lo tlan chu ding tura an hrilh hnuah ding duh loa a tlanzui avangin helho a phur nia ringin security force-te chuan an kap a, motor-a chuang mi pariat zinga paruk chu an kaphlum a ni, a ti. He thil thleng vanga a tuk, December 5-a tualchhung mite leh security force-te inkara buaina chhuakah civil mi pariat an thi leh a ni.