Meghalaya sorkarin SSA teacher-te thla 2 hlawh pe dawn

Meghalaya-a Sarva Shiksha Abhiyan (SSA) hnuaia zirtirtuten an hlawh tang pe tura sorkar phuta nawrh an huaihawt hnuah, state sorkar chuan thla hnih hlawh a pe dawn tih a puang.

Education minister Lahkmen Rymbui chuan SSA teacher aiawhte nena an inbiak hnuah, state sorkar chuan an thla hnih hlawh pekna turin cheng vaibelchhe 58 pek chhuah a ni dawn tih a puang a ni.

SSA teacher-te hian thla nga hlawh an la tawh lo a, an hlawh tangte pek phutin tunkar tir khan mi 500 chuang kawng an zawh a ni.

Meghalaya-ah hian SSA teacher hi 12,541 an awm a, heng zirtirtute thla khat hlawh hi Rs vbc 29 a tling a ni. Hlawh lak chungchanga an harsatna chinfel a nih theihna turin state sorkar chuan sorkar laipui pawh a nawr dawn tih Minister chuan a sawi a, zirtirtute nen pawh hemi kawngah hian an thawhho zel a ṭul thu a sawi bawk.