AP Police leh sipai inkarah buaina chhuak FIR an theh lut ve ve

Arunachal Pradesh-a Bomdila khuaah police-te leh sipaite inkarah Inrinni khan buaina a chhuak a, police leh sipai te hian FIR an thehlut ve ve a ni.

DC Sonal Swa­roop leh SP Raja Banthia-te chuan Zirtawpni liamta zanah khan sipai ṭhenkhat chuan Bomdila-a Buddha Mahotsav lawmnaah police pakhat an sawisa niin an sawi a, hemi anih avang hian police sawisatu zinga pahnih hi police station-ah hruaiin medical exam an nei tih an sawi. Medical exam aṭang hian an rui tih hriat a ni a, sipai Major chu police station-ah kalin ngaihdam a dil nghe nghe niin an sawi bawk.

Hetihlai hian Defece thu­puangtu Col Harsh Wardhan Pande chuan sipai pahnihte hi police station-ah hian na taka kutthlak an nih thu a sawi a, Indian Army an nih thu an sawi hnuah pawh engahmah an ngai lo niin an sawi. Heng sipai pahnih e hian medical treatment pawh an la niin a sawi ve thung.

Banthia chuan an puhna hi a pha thung a, an laka thununna an lekkawk ang chin chin chu an awmdan dik lo tak avang leh hmeichhe laka an chet dan vang a nih thu a sawi a, mahni inven nan chiah force an hmang niin a sawi a ni.

Banthia chuan Inrinni zingah khan 2nd Arunachal Scouts Commanding Officer, Colonel rank officer pakhat, Major leh sipai eng emaw zat Bomdila police station-ah an kal thu sawiin CO chuan police-te chu vauin OC pawh thahah a vau tih a sawi a, OC chu battalion hmaa ngaihdam dil turin a ti bawk niin a sawi.

SP chuan sipaite chu an kal leh mai thu sawiin a hnu lawkah ralthuam keng sipai 100 vel chu truck in LMG nen an lokal leh tih a sawi a, CRPF hnenah ṭanpuina an ngen hial niin a sawi. Sipai te hian an bungrua te an tihchhiat bakah an lirthei darthlalang te an tihkeh sak tih sawiin, DC a hriattir nghal vat tih a sawi. DC a lo thlen hnu pawh chuan lungin an la vawm thu a sawi a ni.

DC Swaroop chuan sipai te chuan chemte te pawh an keng nia sawiin an hotupa ber pawh chuan ngaihdam dil a tum loh hmel hle niin a sawi.

Lt Col Pande chuan CO chuan SP Office-ah Banthia chu thil awmdan sawipui a tum niin a sawi thung a, mahse police-te chuan CO vengtute chu tibuaiin in an lakah mawi lo taka che in leh ṭawngkam dengkhawng tak tak te an hman avangin an inkarah buaina a chhuak ta niin an sawi ve thung a, CO leh SP chuan buaina chhuak chu an ṭhelh niin an sawi a ni.