Manipur buaina chinfel a harsa: Army

Army official senior chuan Manipur buaina chu thil chinfel harsa tak a nih thu sawiin hel pawl hrang hrangin thil ngiat hrang hrang an neih vangin buaina chinfel chu a harsa hle niin a sawi.

Manipur-ah hian hel pawl 30 vel an awm nia sawi a ni a, heng hel pawl hian thil ngiat hrang hrang an neih bakah Naga hel pawl NSCN(I-M) leh NSCN(K)-te chuan ‘Nagalim’ emaw greater Nagaland emaw an lo ngiat ve reng tih Major General VK Mishra, GOC of 57 Mountain Division chuan a sawi a ni.

Major General VK Mishra chuan Kuki pawl 16 te pawhin state hran an ngiat tih sawiin United People’s Front-a pawl pariat te pawhin hill state hran an ngiat tih a sawi a, state chhunga pawl hrang hrang awm chuan remna zawnga inbiakna kalpui a ti harsa hle tih sawiin hna a harsat thu a sawi.

VK Mishra chuan hemi a nih avang hian buaina chingfel tur chuan hun a la duh rei dawn hle niin a sawi bawk. Manipur state chu helna, hnam vanga buaina leh sualna hrang hrang leh ruihhlo vangin an buai hle tih sawiin sipai te leh security force hrang hrang, Assam Rifles-te thleng pawhin an theihtawp an chhuah tih a sawi a ni.

Manipur CM N Biren Singh chuan hel pawl hrang hrang te hi inbiakna neihpuiah a sawm tih sawiin hel pawl te chhanna hi an la nghak tih sorkar official pakhat chuan a sawi a, pawl tenau zawk te chuan inbiakna neih hi remti tawh mah se pawl lian zawk aṭangin chhanna an la hmu lo niin a sawi.