Assam-ah bandh khapna Legislation pawm maithei: Biswa Sarma
Assam state Finance Minister leh Bharatiya Janata Party (BJP) hruaitu hlun Himanta Biswa Sarma chuan Pathianni khan Assam-a bandh kalpui fo khapna tur legislation an chhawpchhuah dawn thu a sawi.
Himanta Biswa Sarma chuan Assam sorkar chuan bandh khapna dan a siam tur a ni tih sawiin, High Court pawhin kawng a kawhhmuh tih a sawi. Hemi chungchang hi Cabinet meeting neih leh hunah a sawichhuah dawn thu leh, bandh culture chu dodal a ṭul thu a sawi a, tu pawh bandh huaihawt tu chu ni se kan dodal tur a ni, a ti.
Inrinni-a bandh huaihawt anih chungchang sawiin BJP huaihawt pawh nise a dinhmun chu a ngai reng dawn tih sawiin court in a phal loh miau chuan bandh chu a thlawp dawn lo niin a sawi. Mahse BJP in bandh an huaihawt leh huaihawt loh chungchangah chuan thuneitu a ni lo niin a sawi bawk.
BJP in bandh huaihawt ta se i dodal angem tih zawhna chu chhangin Sarma chuan party aiawh chuan thil a sawi theih loh thu leh, an party dodal tur khawp chuan huaisenna a nei lo tih a sawi a, thutlukna siam theitu pawh a ni lo niin a sawi.
Sarma chuan High Court-in bandh chu dan kalh nia a puan miau chuan dodal a ni tur a ni, a ti bawk. Sorkar dinna chu bandh chu AGP, BJP, AIUDF, AASU leh pawl dang daih huaihawt pawh ni mah se High Court chuan dan kalh niin an puang a, chu chu an pawm tih a sawi a ni.
Gauhati High Court chuan an state chhunga bandh huaihawt chu dan kalh a nih thu a puang a, chu chu tu pawhin an pawm tur a ni tih sawiin bandh huaihawttute lam ngaihtuah lo in an dodal mai tur niin a sawi. Hetianga an ti thei a nih chuan Assam chuan hma a sawn ngei dawn niin a sawi a ni.
Assam-ah hian bandh huaihawt hi a tam hle a, political party leh civil organization hrang hrang te mai piah lamah hel pawl thleng pawhin bandh huaihawt hi a tam hle a ni. Citizenship Amendmend Bill leh NRC chungchangah phei chuan bandh huaihawt hi a tam lehzual a, nunphung a tihbuai bakah chhiah lam thlenga a nghawng avangin state economy pawhin na tuar hle nia sawi a ni bawk.