Manipur : Vawiinah inthlan thawh 2-na nei dawn ; Polling booth 12-ah vote thlak ṭha dawn

Manipur Legislative Assembly inthlan thawh hnihna chu vawiin hian neih a ni dawn a, assembly bial 60 zinga bial 22-ah vote thlak a ni ang.

Vote thlakna tur bial 22 hi district paruka mi niin, heng zinga district pali chu international border nei an ni. Hei bakah state border nei district pahnih awm bawkin, venhimna lam pawh khauh taka kalpui a ni.

Inthlan thawh hnihnaah hian candidate 92 awmin, an zingah hmeichhia pahnih chiah an tel. Candidate 92 zinga 16 (17% ) chu criminal case nei lai an ni a, an zinga 14 (15%) chu serious cirminal case nei an ni. Criminal case nei lai candidate pathum emaw a aia tam emaw awmna, red alert constituency pahnih a awm a ni. Candidate 52 (57%) chu hausa tawntawn, crorepati niin, inthlan thawh hnihnaa candidate thil neih chawhrual hi Rs vbc 2.61 a ni.

Candidate 92 zingah 22 chu BJP candidate an ni a, Indian National Congress (INC) 18, National People's Party (NPP) 11, Janata Dal United (JD(U)) leh Naga People's Front (NPF) in 10 ve ve, Republican Party of India-Athawale (RPI-A)-in pathum, Shiv Sena leh Nationalist Congress Party (NCP)-in pahnih ve ve, Rashtriya Janhit Sangharsh Party (RJSP) leh CPI-in pakhat ve ve bakah independent candidate 12 an awm.

Vote thlakna tur, polling station 1,247 a awm a, heng zinga 34 chu model polling station niin, hmeichhe hlangin an enkawl tur polling station 223 siam tel a ni bawk.

Polling booth 12-ah vote thlak ṭha dawn
Election Commission of India (ECI) chuan Manipur assembly inthlan thawh khatna, February 28-a neihna zinga polling booth 12-ah vawiina inthlan thawh hnihna neih rualin vote thlak ṭha turin thupek a tichhuak tih Manipur chief electoral officer Rajesh Agrawal chuan a sawi.

February 28-a inthlan neihah heng polling booth 12-a Electronic Voting Machine (EVM)-te chu misualten an tichhia a ni. Returning officer-te report leh rawtna siamte an enfiah hnuah ECI chuan vote thlak ṭha turin a ti ta a ni. Vote thlak ṭhatna turte hi district pahnih - Imphal East leh Churachandpur district huam chhunga mite an ni.

Inthlan thawh khatna hi assembly bial 60 zinga 38-ah neih a ni a, report kimchang a luh hnuah vote tla hi 88.63% a tling tih CEO chuan a sawi.