AP police-ten Ponzi scheme scam-a bul tumtu ber man

Arunachal Pradesh-a capital police-te chuan investor-te sum tam tham tak tihchingpenna, Ponzi scheme scam-a a bul tumtu ber, Braj Kishore Chaudhury chu Patna, Bihar-ah an man.

SP Jimmy Chiram chuan Ponzi scheme hi a pung tam tak pek tiama investor-te sum an dah tirna a ni tih sawiin, a tir lamah investor-te hi a pung te ṭha taka pek niin, a hnua invest an tam hnuah tihtan sak zui an ni tih a sawi. Ponzi scheme hmang hian investor 6,000 vel sum, cheng vaibelchhe 17 vel chu tihchingpensak an ni.

Jimmy Chiram chuan sum tihchingpenna a bul tumtute hi kum khat dawn police-ten man tuma an zawn hnuah, February 23 khan Braj Kishore Chaudhury hi an man thei ta tih a sawi. A thurualpui, Raju Dutta, Nishith Murthy, Joydeep Dutta, Santosh Kumar, Bipin Kumar leh Deepak Kar bakah BK Sharma-te pawh man tel an ni tih a sawi bawk.

Chiram chuan he inbumna hi hriatchhuah a nih hnuah kum 2021 khan charge-sheet siam a ni tih sawiin, sum tihchingpen Rs vbc 17 zinga Rs vbc 8 chu hmuh let a ni tawh tih a sawi. Mipuite chu investment an tih dawnin document-te uluk taka chhiar chiang phawt ṭhin tura ngenin, rinhlelhna an neih chuan police lamah thlen thuai ṭhin turin a chah. Dik lo taka an sum tihchingpen sak an nih pawhin, police-te ziak ngeia complaint thehluh a nih loh chuan an tan hma lak theih a ni lo tih a sawi bawk.