Urban local body-a hmeichhiate tana 33% dah chungchang State sorkarin a ngaihtuah thuai dawn : Nagaland CM

Nagaland chief minister Neiphiu Rio chuan a kaihhruai sorkarin Urban Local Bodies (ULB)-a hmeichhiate tana 33% reservation dah chungchang sawiho a, a ngaihtuah thuai tur thu a sawi.

CM Rio chuan ULB-a hmeichhiate chanpual dan rawtna zirchiang tur state sorkarin committee a din chuan report a thehlut tawh a, cabinet meeting neih leh hmasa berah ngaihtuah a ni ang, a ti.

Supreme Court-in Constitution 74th Amendment-a tarlan angin hmeichhiate tana 33% reservation dah a, ULB inthlan buatsaih tura thupek a tihchhuah hnuah, kum 2017 khan Nagaland sorkar chuan Nagaland Municipal and Town Council Act siamṭhatin ULB inthlan hi a buatsaih a ni. Mahse inthlan neih tur puan a nih hnuah state chhungah buaina chhuakin mi pahnihin an thih phah a, sorkar leh mimal hmunte pawh nasa taka tihchhiat niin, chief minister TR Zeliang pawh thlak a nih phah hial a, a aiah Shurhozelie Liezietsu dah a ni.

Tribal Hoho leh civil society organisation eng emaw zat chuan ULB inthlana hmeichhiate chanpual dahsak hi an duh lo a, an hnam dan a nih loh bakah Nagaland tana special status pekna, Constitution-a Article 371 (A) bawhchhiatna a ni bawk niin an sawi.

Kum 2021, October thla khan state sorkar chaun Nagaland chief secretay kaihhruai committee dinin, Municipality Act enṭha tur leh, hmeichhiate tana reservation siam chungchangte ennawn turin a ti a ni. Committee hian civil society organistation hrang hrangte ṭum eng emaw zat meeting a neihpui hnuah state sorkar hnenah report a thehlut a ni.