Nagaland kawngpui dan titawp lailawk

Assam-a Karbi Anglong zirlai pawl kaihhruaia Nagaland-in Assam ram chin an luah nia puha lungawi lohna lantira  kawngpui  dan chu nimin aṭang khan tihtawp lailawk a ni. 

Karbi Students' Association (KSA) president Bijoy Bey chuan Assam sorkar official-te chuan ramri buaina chung changa an buai mekna chinfel dan ngaih­tuahin Nagaland lamin inbiakna neih an remtih thu an hrilh tih sawiin, kawngpui dan chu titawp rih tura an ngen avangin a titawp lailawk tih a sawi. 

Hemi avang hian kawngpui dan an ṭhulh tihna a ni lo tih a sawi a, ramri buaina chinfel phutin an la bei chhunzawm zel dawn tih a sawi nghal bawk.

Thawhlehni khan Nagaland-a Dimapur deputy commissioner leh commissioner of police-te chuan Diphu (Assam) deputy commissioner leh official dangte nen Nagaland-in Assam ram a luah chin nia Karbi Anglong district-in an puhna hmun hi an tlawh a, meeting an nei zui nghal a ni. 

KSA kaihhruaiin Karbi Anglong district-a pawl hrang hrang chuan Naga­land chuan dan kalhin Assam ram chin a luah nia puhin, Thawhlehni aṭang khan Nagaland pawhtu, NH 39 an dang a ni. Kawngpui dan vang hian motor an tangkhang hnem hman hle. 

Assam lamin an sawi danin, Nagaland lam hian Karbi Anglong Autonomous Council (KAAC) region hnuaia Daldari forest reserve-ah Naga mi eng emaw zat tan land certificate a pe chhuak a ni. Hei bakah hian state pahnihte inrinaa border pillar siamte chu Nagaland lam mite hian Assam ram chin an luah theihna atan an tichhia niin an sawi bawk. 

KSA president Bey chuan, "Assam ram hi kum tam tak min luahsak tawh a, mahse Assam sorkar hian hma a la zui ngai lo a ni. Hei vang hian kan ram chin min humhalh sak a, hma la tura thuneitute nawrna atan tiamchin awm loa kawngpui dan hi kan rel ta a ni," a ti. 

Hetih lai hian Dimapur thuneitute chuan British awpna hnuaia awm laia map an siama state pahnih ramri an siam chu Nagaland lamin a pawm lo a, hemi chungchang hi Supreme Court-ah thlen ni tawhin, ngaihtuah tura dah mek a ni tih an sawi thung.  Assam ram chinah Naga mite tan land certificate pek chhuah nia Assam lamin an puhna chu official-te chuan thu dik lo a ni tih an sawi bawk. 

Assam leh Nagaland ramri hi km 512-a thui niin, kum 50 chuang chu ramri chungchangah hian buaina an nei tawh a ni. Nagaland chuan Assam ram chin nia sawi chu a ram niin a chhal a, hetih lai hian Assam lam chuan Nagaland hi an ram chin dan kalha luahah an puh ve bawk. 

Sorkar laipui chuan an buaina chinfel dan tur ngaihtuah turin commission pahnih a lo din tawh a, mahse state pahnihte hian commission pahnihte rawtna hi an hnawl ve ve a ni. Ramri inchuh vang hian buaina pawh a chhuak fo a, mi 100 chuangin nunna an chan tawh a, an zinga a tam zawk chu Assam lam mi a ni.