Editors Guild aṭangin Shillong Times editor a bâng

Shillong Times editor, Patricia Mukhim chu Editors Guild of  India aṭangin a bang a, 'celebrity' journalist-te thlavang chauh a hauhsak duh niin a sawi. 

Kumin July 4-a Facebook-a a thu post chungchanga Meghalaya High Court-in a chungthu a relsak danah Editors Guild-in a thlavang a hauhsak duh loh avangin Mukhim hian banna hi a thehlut a ni. 

Facebook-ah hian Lawsohtun, Shillong-a tribal mi ṭhenkhatin non-tribal te kut an thlak chungchang a post avangin  Mukhim lakah hian complaint thehluh a ni a, High Court chuan Mukhim chu tribal leh non-tribal te inkara inhuatna chawh chhuah tumah a puh zui a ni.

Banna a thehluhah, Mukhim chuan a chunga thil thlengah thawm an chhuah duh loh laiin, Editors Guild chuan an member pawh ni lo, journalistic work kaihhnawih ni miah loa man, Arnab Goswami chu theihtawpin an chhan leh si niin a sawi. Hei vang hian mi lar chin chauh tana aw chhuahtu pawlah chuan a tan awm zui zel a rem lo tih a sawi.